Pyetja:

Selam alejkum!
A lejohet që në namazin e vitrit, kur të ngremë duart, të bëjmë dua edhe shqip? Dhe nëse ka mundësi të tregoni se cilat dua ka thënë Muhamedi a.s.?

Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit!

Thënia e lutjeve brenda në namaz në ndonjë gjuhë tjetër dhe jo në gjuhën arabe është shumë delikate dhe gjatë shtjellimit të saj duhet të kemi kujdes se si po kuptohemi. Kjo për faktin se shumë njerëz nga paragjykimi që kanë mendojnë se me thënien e lutjeve në gjuhën arabe i bëjnë nënvlerësim gjuhës së tyre amtare. Mirëpo në realitet kjo nuk është ashtu, pasi gjuha arabe është gjuha e Kuranit dhe çdo përkthim i cili mund t’i bëhet atij në ndonjë gjuhë tjetër nuk arrin t`i japë domethënie të drejtë dhe të plotë fjalës së Allahut. Pastaj me lënien e Kuranit në gjuhën e shpallur bën që ky libër të ruhet dhe të mos i nënshtrohet devijimit e falsifikimit, ashtu si ndodhi me librat e tjerë të mëhershëm të shpallur (Zeburi, Tevrati, Ingjili). Gjithashtu edhe për shkakun se gjuha arabe konsiderohet gjuha e unisuar e të gjithë muslimanëve anekënd botës dhe pa marrë parasysh se çfarë race, kombi apo gjuhe flet njeriu, leximi i Kuranit në gjuhën arabe e bën atë të barabartë dhe të bashkuar me besimtarët e tjerë.

Këto janë vetëm disa nga faktet që e bëjnë të domosdoshme përdorimin e gjuhës arabe në ritualin e namazit. Prandaj themi se këndimi i Kuranit në gjuhën arabe brenda në namaz është i domosdoshëm dhe nuk lejohet që ta lexojmë atë me ndonjë gjuhë tjetër gjatë faljes.

Ndërsa në lidhje me lutjet (duatë), themi se ato lutje të cilat janë obligative të lexohen, sikurse etehijati, salavatet, subhane rabijel adhim, etj., këto gjithashtu janë të domosdoshme të lexohen në gjuhën arabe dhe ky është qëndrimi më i drejtë i dijetarëve. Këtu hyn edhe lutja e Kunutit, e cila bëhet në namazin e vitrit, për të cilin ju bëni pyetje.

Kurse lutjet e tjera shtesë, të cilat dëshiron t’i bëjë njeriu gjatë faljes, p.sh. gjatë sexhdes, ose gjatë uljes (teshehudit) para selamit ose në ndonjë vend tjetër, nëse pasi t’i këndojë lutjet e vërtetuara që duhet të thuhen në atë vend, dëshiron të bëjë lutje shtesë, atëherë nuk ka të keqe t’i drejtohet Zotit të tij me gjuhën e tij. Gjithashtu edhe nëse kështu vepron gjatë duasë së vitrit, pasi ta ketë kënduar duanë e kunutit, nuk ka të keqe ta lusë Allahun e Madhëruar me gjuhën shqipe. Zoti e di më së miri!

Për sa i përket duave që ka thënë i Dërguari, lavdërimi dhe paqja qofshin mbi të, gjatë vitrit, ju këshillojmë që t’i ktheheni librit "Mburoja e Muslimanit”, ku do të gjeni shumicën e lutjeve që ka bërë Muhamedi salallahu alejhi ve selem, qoftë në namaz, qoftë në situata të tjera.

Alaudin Abazi