Përgjigja:
Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.
Lejohet që ju të faleni duke e mbajtur beben në dorë dhe namazi i juaj është i plotë dhe i saktë, posaçërisht nëse për të nuk ka kush të përkujdeset.
Argument për këtë kemi vetë praktikën e Resulullahut (salallahu alejhi ue selem) ku transmetohet në dy koleksionet më të sakta (Buhariu dhe Muslimi) se Resulullahu (Paqja dhe bekimi i Allahut qofshin mbi të!) falej duke e mbajtur Umamen (vajza e vajzës së tij) në dorë, kështu që kur shkonte në ruku e linte atë në tokë dhe kur ngritej e merrte prap. Në transmetimin e Muslimit është edhe shtojca se ai këtë e bënte duke qenë imam në xhami.
Nëse fëmija qan tepër dhe detyroheni ta ndërprisni namazin, lejohet ta bëni këtë, por ajo duhet të përsëritet nga fillimi. Gjithashtu, këtu e bëjmë edhe një sqarim të nevojshëm se lejohet që gjatë faljes të përkundet fëmija, por kjo lëvizje mos të na bëjë që ta ndryshojmë anën e kibles. Allahu e di më së miri.

 

Alaudin Abazi
16.02.2006