Pyetja:

Es-selamu alejkum!
Desha t’ju pyesja në lidhje me veshjen në namaz. A është e obliguar femra në shtëpi të veshë mantil (hixhab) për t’u falur, edhe pse nuk ka meshkuj në shtëpi? A lejohet të vishet me fustan të gjerë apo rroba të gjera që janë të zbukuruara ?
Allahu ju shpërbleftë!

Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Gjatë faljes së namazit në shtëpi femra nuk e ka obligim që të mbajë mantilin (hixhabin) apo veshjen që vë mbi rroba kur del jashtë. Ajo që kërkohet gjatë faljes është që femra t`i ketë të mbuluara të gjitha pjesët e trupit, përveç duarve dhe fytyrës. Nuk kushtëzohet të bëhet mbulimi i këtyre pjesëve me ndonjë veshje të caktuar, por mjafton që rroba të jetë e gjerë, prandaj mund të falet edhe me fustane që nuk janë të ngushta dhe shamia t`i mbulojë edhe krahët së bashku me kokën. Gjithashtu, edhe nëse janë të zbukuruara këto veshje nuk prish punë, pasi ndalimi i këtyre llojeve të rrobave ka të bëjë nëse dilet jashtë në rrugë, që të mos tërheqë vëmendjen e meshkujve të huaj. Allahu e di më së miri!

Alaudin Abazi