Pyetja:

Selam alejkum vëllezër. Kisha një pyetje.
Namazi i istihares falet kur jemi në dilemë ose kërkojmë udhëzim prej Zotit dhe në fund e bën një lutje. A vjen udhëzim në fund nga Zoti, d.m.th. Zoti t’i sjell mendimet e mira ose të këqija varet sipas veprës apo jo? A mund të ndërhyjë shejtani në këtë namaz, d.m.th. të jetë udhëzim prej shejtanit?

Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Namazi i istihares falet për t’ia dorëzuar çështjen për të cilën kemi dilemë Allahut të Lartësuar. Nëse njeriu është i sinqertë, i mbështetet Allahut të Lartësuar, pastaj këshillohet me njerëzit për çështjen dhe zgjedh opsionin nga i cili i anon zemra, pastaj qëndron i vendosur në këtë vendim duke e kërkuar mbështetjen e Allahut të Lartësuar, atëherë Allahu do të jetë me të dhe në këtë, me lejen e Allahut, nuk ka mundësi të ndërhyjë shejtani, pasi ky person ka pasuar udhëzimin e Tij. Allahu i Lartësuar thotë: “...e konsultohu me ta në të gjitha çështjet, e kur të vendosësh, atëherë mbështetu në Allahun, se Allahu i do ata që mbështeten.” (Ali Imran, 159)
Allahu e di më së miri!
 

Alaudin Abazi