Pyetja:
Selam alejkum! Unë i fal pesë kohët e namazit dhe dëshiroj të agjëroj, mirëpo nuk do të më lënë prindërit. Si të veproj?
Përgjigjja:
Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.
Nuk e dimë moshën tuaj që të japim ndonjë vlerësim të prerë, por mund të supozojmë se jeni i ri, prandaj ndoshta është i arsyeshëm kundërshtimi i prindërve. Sido që të jetë, nëse ju keni arritur moshën e pjekurisë (pubertetit), atëherë obligoheni me agjërim. Nëse nuk keni arritur moshën e pjekurisë, atëherë më mirë është të respektoni mendimin e prindërve dhe edhe nëse agjëroni, le të jetë për disa ditë të muajit.
Nëse keni hyrë në moshën e pjekurisë, por megjithatë prindërit kundërshtojnë të agjëroni, atëherë ju duhet të tentoni t`i bindni, duke biseduar me ta apo edhe të kërkoni përkrahje nga dikush i afërm i familjes për të cilin prindërit tuaj kanë respekt, i cili agjëron dhe e njeh obligueshmërinë e këtij adhurimi. Të kërkoni nga ai që të flasë me prindërit tuaj, që ai të ndihmoj për ndryshimin e mendjes së familjes suaj. Lusim Allahun e Lartësuar t’ju forcojë në këtë rrugë, t’ju japë sukses dhe t’ju udhëzojë ju dhe familjen tuaj në çdo punë të mirë. Amin!
Alaudin Abazi 12.9.2008
|